A existencia e conformación dos nosos colexios, só se pode entender a partir da identidade, opcións e compromiso da Compañía de María coa educación. É preciso, por iso, explicar o ideario que inspira e singulariza, respectando o marco normativo, a nosa oferta educativa e que se concreta no proxecto de Centro.

O proxecto de educación Compañía de María conta cunha longa tradición de catro séculos. Ten como protagonista unha muller: Xoana de Lestonnac nacida en Burdeos en 1556.

Relación que acompaña, integra e fai medrar 

• Acolle a diversidade e responde a cada persoa na súa orixinalidade.
• Favorece a comunicación e o diálogo.
• Potencia a autoestima, o crecemento do positivo e a integración no grupo.
• Posibilita a cada un/unha dar sentido á súa vida a través do encontro consigo mesmo, cos outros e co Deus de Xesucristo.
• Fai do educador testemuña comprometida e compañeiro do crecemento persoal do alumno.
• Crea marcos de referencia desde os que orientar o comportamento en responsabilidade e respecto.
• Axuda a crear conviccións desde as que a persoa actúe respectando os demais.

Educar na vida e para a vida

• Coñecendo o contexto e analizándoo para dar resposta.
• A través dunha metodoloxía acción-reflexión-mellora na que teoría e práctica se harmonizan.
• De xeito que se goce aprendendo.
• Para que cada alumno/a desenvolva as súas capacidades e se sitúe activamente na vida.
• No compromiso solidario para a transformación das estruturas inxustas.

Educar en comunidade desde un proxecto común

A través de:

• Unha escola "comunicativa que dá canle ás iniciativas e inquedanzas de todos os seus membros onde todos se senten implicados desde a complementariedade, a corrresponsabilidade e o traballo en equipo.
• A coherencia entre os principios e valores do Proxecto e a vida da comunidade.
• Unha organización flexible que se adapte decote á novidade da vida en crecemento.
• A formación permanente de todos os seus membros na pedagoxía que sustenta  o proxecto.
• A avaliación continua e conxunta de todo o proceso educativo.

Formación de cabezas ben feitas, mellor que ben cheas
 

Permite ao alumno:

• Ser suxeito da súa propia educación.
• Ser quen de percorrer os camiños do saber de forma autónoma.
• Aprender a aprender en cada novo contexto.
• Facer da resolución de conflitos motivo de novas aprendizaxes e do comportamento, o reflexo do desenvolvemento persoal e cultural.
• Construír unha visión global dos feitos e facelos seus con sentido crítico.

voltar arriba

http://www.lestonnac.org

OBXECTIVO XERAL DO CURSO

O Colexio establece ao inicio do ano escolar un obxectivo xeral de curso, que dará a pauta e será o fío condutor para todas as actividades, celebracións e proxectos a realizar ao longo do curso.

O obxectivo xeral do curso é a potenciación entre toda a comunidade educativa (profesores, alumnos e persoal non docente) da concepción da persoa como fin da educación.

O Centro emisor e receptor de todo o dinamismo educativo do proxecto de educación Compañía de María é a persoa. Unha persoa que é única e irrepetible, orixinal na súa singularidade, con identidade e nome propios, filla de Deus e chamada a vivir como irmá entre os homes. Criatura cun destino de plenitude que, lonxe de cortarlle posibilidades, ábrea cara a horizontes insospeitados.

Entrar en relación con ela, querela, coñecela, acompañala, ser testemuña do seu proceso de crecemento, devolverlle a súa verdade, establecer unha interacción positiva, son algúns dos irrenunciables da nosa educación personalizada e personalizadora.

A persoa, cada persoa, en cada tempo e lugar, é espazo de novidade que recrea, decote, o noso servizo educativo. Isto require apertura e contextualización, espírito universal e adaptación, conciencia do presente e do inacabado, inculturación e interculturidade. Lévanos a crear un proxecto aberto e atento á chamada do outro, que dá resposta educativa desde a dialéctica de escoitar e responder de maneira continua.

Entrar en contacto coa realidade, experimentar as súas posibilidades e límites, analizar as situacións, impulsar a creatividade, son riqueza e risco ao mesmo tempo. O educador da Compañía de María ten que sentirse chamado a saír de sí e doarse nesta tarefa.

Para acadar este obxectivo principal é necesario tamén por tanto potenciar a intelixencia emocional: ante a importancia que ten esta no desenvolvemento da persoa, propoñémonos profundizar neste tema ao longo do curso, partindo dunha formulación xeral para todo o claustro a principio de curso, e realizando logo reunións por niveis.

Finalmente, tras a experiencia positiva nos cursos pasados, seguiremos impulsando as escolas de pais cun grupo de Infantil e Primaria e outro de Secundaria. Contamos coa colaboración da Xunta Directiva da ANPA, e en Secundaria en coordinación con Programa de Prevención de Drogodependencias que se está desenvolvendo en colaboración con Proxecto Home e que xa se implantou na ESO.

voltar arriba